Հայաստանի պատմական քարտեզների ցուցադրություն Վարենայում

06 փետրվարի, 2020

Փետրվարի 6-ին Լիտվայի Վարենա քաղաքի հանրային գրադարանում տեղի ունեցավ «Հայաստանը հնագույն քարտեզներում» ցուցահանդեսի բացման արարողությունը, որը Վարենայի քաղաքապետարանի աջակցությամբ նախաձեռնել և կազմակերպել էին Լիտվայում ՀՀ դեսպանությունն ու Վարենայի հանրային գրադարանը:

Հանդես գալով բացման խոսքով՝ դեսպան Մկրտչյանը նշեց, որ առաջին անգամ 2015թ․ ներկայացված և Հայոց ցեղասպանության 100-րդ տարելիցին նվիրված ցուցահանդեսը որոշ առումներով նաև պատմական փաստաթղթերի ժողովածու է, որը ցույց է տալիս հայ ժողովրդի պատմական հայրենիքի սահմանները, պատմության փառահեղ և ողբերգական էջերը։

Շնորհակալություն հայտնելով կազմակերպիչներին և քաղաքապետ Ալգիս Կաշետային ցուցահանդեսը հյուրընկալելու համար՝ դեսպան Մկրտչյանը նշեց, որ բալթյան շատ քաղաքներում արդեն ներկայացված ցուցահանդեսը դեսպանության և Վարենա քաղաքի միջև հերթական արդյունավետ համագործակցության դրսևորումն է։

Ողջույնի խոսք ասաց նաև Վարենայի քաղաքապետ Ալգիս Կաշետան, ով կարևորեց նման միջոցառման անցկացումը որպես լավ նվեր քաղաքի բնակիչներին և հնարավորություն ծանոթանալու Հայաստանի պատմությանը, հնագույն քաղաքակրթությանը։ Քաղաքապետն իր պատրաստակամությունը հայտնեց առաջիկայում դեսպանության հետ նոր միջոցառումներ և նախաձեռնություններ կյանքի կոչելու ուղղությամբ։

Ցուցահանդեսը բաց է լինելու մինչև ս․թ․ փետրվարի 26-ը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր