Դեսպան Տիգրան Մկրտչյանի հանդիպումը Լիտվայի պաշտպանության նախարարի տեղակալ Մարգիրիս Աբուկևիչյուսի հետ

01 փետրվարի, 2021

Փետրվարի 1-ին Լիտվայում ՀՀ դեսպան Տիգրան Մկրտչյանը հանդիպեց Լիտվայի պաշտպանության նախարարի տեղակալ Մարգիրիս Աբուկևիչյուսի (Margiris Abukevičius) հետ:

Հանդիպման ընթացքում կողմերը քննարկեցին երկու երկրների պաշտպանական գերատեսչությունների միջև առկա համագործակցության ոլորտներն ու դրանց խորացման հեռանկարները։

Նախարարի տեղակալ Մ․ Աբուկևիչյուսը դեսպան Մկրտչյանին ներկայացրեց պաշտպանության և անվտանգության ոլորտում Լիտվայի նոր կառավարության առաջնահերթությունները և նշեց, որ ԱլԳ շրջանակներում համագործակցությունը շարունակելու է առաջնային լինել Լիտվայի համար։ Դեսպանը բարձր գնահատեց լիտվական կողմի պատրաստակամությունը երկու երկրների միջև համագործակցությունը պաշտպանության ոլորտում շարունակաբար խորացնելու հարցում։

Դեսպան Մկրտչյանը զրուցակցին ներկայացրեց Ադրբեջանի կողմից Արցախի նկատմամբ Թուրքիայի աջակցությամբ և վարձկան-ահաբեկիչների ներգրավմամբ իրականացված ագրեսիան, 2020թ․ նոյեմբերի 9-ի և ս․թ․ հունվարի 11-ի եռակողմ հայտարարություններից հետո Արցախում տիրող իրավիճակը՝ ընդգծելով ռազմագերիների, պատանդների և պահվող այլ անձանց անհապաղ, առանց նախապայմանների և անվտանգ հայրենադարձման առաջնահերթությունը Հայաստանի համար:

Նախարարի տեղակալ Մ․ Աբուկևիչյուսն իր ցավակցությունը հայտնեց պատերազմի հետևանքով կորսված մարդկային կյանքերի համար և նշեց, որ Ղարաբաղյան հակամարտությունը երկարատև լուծում կարող է գտնել միայն բանակցությունների միջոցով ԵԱՀԿ ՄԽ համանախագահության հովանու ներքո։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր