Կայացավ ՀՀ Էկոնոմիկայի նախարար Գևորգ Պապայոնի այցը Լիտվա

10 սեպտեմբերի, 2024

ՀՀ Էկոնոմիկայի նախարար Գևորգ Պապոյանը ս․թ․ սեպտեմբերի 8-10-ը պաշտոնական այցով գտնվում էր Լիտվայի Հանրապետությունում։

Այցի շրջանակում նախարարը եռակողմ հանդիպում է ունեցել Լիտվայի Հանրապետության արտաքին գործերի նախարար Գաբրիելիուս Լանդսբերգիսի, Էկոնոմիկայի և նորարարության նախարար Աուշրինե Արմոնայտեի հետ։ Հանդիպմանը ներկա են գտնվել Լիտվայում ՀՀ արտակարգ և լիազոր դեսպան Արա Մարգարյանը, նախարարի տեղակալ Նարեկ Հովակիմյանը,

Նախարար Գ․Պապոյանը նշել է, որ Հայաստանը գնում է տնտեսության դիվերսիֆիկացման ճանապարհով, ինչը նշանակում է, որ առկա է մեծ հնարավորություն համատեղ ուժերով տնտեսական համագործակցությունն էլ ավելի զարգացնելու։ Զրուցակիցները փաստել են, որ հայ-լիտվական առևտրատնտեսական հարաբերություններն ունեն ընդլայնման մեծ ներուժ:

Կողմերը մտքեր են փոխանակել ներդրումների ներգրավման, ԵՄ ստանդարտների համապատասխանեցման, ԵՄ-ի հետ առևտրատնտեսական կապերի խորացման և երկուստեք հետաքրքրություն ներկայացնող մի շարք այլ հարցերի վերաբերյալ։

Անդրադառնալով Կառավարության խաղաղության օրակարգին՝ Գ․ Պապոյանը ներկայացրել է «Խաղաղության խաչմերուկ» ծրագրի հնարավոր տնտեսական առավելություններն ու կարևորությունը՝ Հարավային Կովկասում կայուն և տևական խաղաղություն հաստատելու գործում։

Հանդիպման ավարտին կողմերը վստահություն են հայտնել, որ համատեղ ջանքերով կհասնեն հայ-լիտվական տնտեսական օրակարգի ընդլայնմանն ու հետագա խորացմանը:

Նույն օրը նախարարը հանդիպում է ունեցել նաև Լիտվայի Հանրապետության գյուղատնտեսության նախարար Կազիս Ստարկևիչյուսի հետ։

Հանդիպման ընթացքում քննարկվել են Հայաստանում և Լիտվայում գյուղատնտեսության զարգացմանն ու երկկողմ համագործակցության ընդլայնմանը վերաբերող հարցեր։

Անդրադարձ է կատարվել արտահանման շուկաների դիվերսիֆիկացմանը, երկու երկրների միջև ագրոպարենային ապրանքների շրջանառության մեծացմանը, գյուղատնտեսության թվայնացմանն ու ոլորտում նորագույն տեխնոլոգիաների ներդրմանը։

Գ․Պապոյանն առաջարկել է դիտարկել գյուղատնտեսության ոլորտում գործող տնտեսավարողների միջև հանդիպումների կազմակերպման հնարավորությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր