«Հայկական փառատոն և տոնավաճառ» Վիլնյուսում

18 օգոստոսի, 2026

Օգոստոսի 15-ին Վիլնյուսի Բեռնարդինների այգում տեղի ունեցավ «Հայկական փառատոն և տոնավաճառ» միջոցառումը՝ նվիրված Լիտվայի կողմից Հայաստանի անկախության ճանաչման 35-ամյակին։

Միջոցառումը կազմակերպվել էր Լիտվայում ՀՀ դեսպանության կողմից՝ Լիտվայում ՀՀ պատվավոր հյուպատոսի գրասենյակի, Լիտվահայերի միության հետ համագործակցությամբ և Լիտվայի ԱԳ նախարարության աջակցությամբ:

Բացման խոսքով հանդես եկան Լիտվայում ՀՀ դեսպան Արա Մարգարյանը, ՀՀ-ում Լիտվայի դեսպան Անդրիուս Պուլոկասը և Լիտվայի Սեյմասի Լիտվա- Հայաստան բարեկամական խմբի ղեկավար Ինգրիդա Բրազիուլիենեն։ Միջոցառման ընթացքում Բալթյան երկրների հայոց թեմի առաջնորդ Գերաշնորհ Տեր Վազգեն Արքեպիսկոպոս Միրզախանյանը կատարեց խաղողի օրհնության կարգը՝ ներկայացնելով տոնի խորհուրդն ու հայկական եկեղեցական ավանդույթի նշանակությունը։

Փառատոնին մասնակցում էին Լիտվայում և Էստոնիայում գործող հայ ձեռներեցներ ու արտադրողներ, որոնք տեղացի սպառողին ներկայացրեցին հայկական խոհանոցը, խմիչքներն ու տարբեր մթերքներ, ինչպիսիք են՝ խորովածը, տոլման, ժենգյալով հացը, հայկական ավանդական գաթան և փախլավան։ Այցելուները հնարավորություն ունեցան ոչ միայն համտեսելու հայկական ուտեստներ, այլև ծանոթանալու հայկական խոհանոցի ավանդույթներին։ Առանձին տաղավարներով ներկայացված էին «Ջերմուկ» հանքային ջուրը և հայկական գինիներն ու պահածոները։ Հայաստանից միջոցառմանը մասնակցում էր «Տերյան» մշակութային կենտրոնը՝ հայկական ավանդական զարդանախշերով աշխատանքներով, ձեռագործ իրերով և հուշանվերներով։

Միջոցառմանը ներկա էին Լիտվայի գործադիր և օրենսդիր մարմինների, ինչպես նաև Լիտվայում հավատարմագրված դիվանագիտական կորպուսի ներկայացուցիչներ։

Մշակութային ծրագրի շրջանակում ներկայացված էին հայկական երաժշտությունն ու պարերը, կազմակերպվել էին նաև սպորտային ցուցադրություններ, շախմատի և նարդու մրցաշարեր, ինչպես նաև վարպետության դասեր։

Միջոցառումը լայնորեն լուսաբանվել է Լիտվայի առաջատար լրատվամիջոցների կողմից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր