Հայաստանի Հանրապետության անկախության 35-ամյակին նվիրված ընդունելություն Ռիգայում

30 սեպտեմբերի, 2026

Սեպտեմբերի 24-ին Ռիգայի պատմական Փոքր Գիլդ սրահում տեղի ունեցավ Հայաստանի Հանրապետության անկախության 35-ամյակին նվիրված ընդունելություն՝ կազմակերպված Լիտվայում ՀՀ դեսպանության և Լատվիայում ՀՀ պատվավոր հյուպատոս Մխիթար Մխիթարյանի համագործակցությամբ։

Միջոցառման բացմանը ողջույնի խոսքով հանդես եկավ Լիտվայում ՀՀ արտակարգ և լիազոր դեսպան Արա Մարգարյանը։

Իր խոսքում դեսպանն անդրադարձավ անկախ Հայաստանի անցած 35-ամյա ճանապարհին՝ ընդգծելով այդ ժամանակահատվածի նշանակությունը Հայաստանի պետականության համար։

Անդրադարձ կատարվեց նաև տարածաշրջանում խաղաղության հաստատման գործընթացին և «Խաղաղության խաչմերուկ» (TRIPP) նախաձեռնության կարևորությանը։

Դեսպան Մարգարյանը շեշտեց նաև Հայաստան–Լատվիա հարաբերությունների վերջին տարիների ակտիվ դինամիկան, մասնավորապես՝ ընթացիկ տարում Լատվիայի նախագահի՝ Հայաստան և ՀՀ ԱԳՄԱ նախարարի՝ Լատվիա կատարած այցերը, որոնք նոր խթան հաղորդեցին երկու երկրների քաղաքական երկխոսությանն ու գործնական համագործակցությանը։

Ընդգծվեց նաև Լատվիայի հայ համայնքի կարևոր դերը՝ որպես երկու ժողովուրդների միջև կապող օղակ։

Ընդունելությանը ներկա էին Լատվիայի արտաքին գործերի նախարարության և Սեյմայի ներկայացուցիչներ, Լատվիայում հավատարմագրված դեսպաններ և դիվանագիտական կորպուսի ներկայացուցիչներ, Բալթյան երկրների հայոց թեմի առաջնորդը, արվեստագետներ, մտավորականներ և հայ համայնքի ներկայացուցիչներ։

Ընդունելության ընթացքում հյուրերը ճաշակեցին հայկական խոհանոցի ուտեստներ և հայկական գինիներ, ինչպես նաև «Ջերմուկ» հանքային ջուր։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր