Հայաստանի Հանրապետության անկախության 35-ամյակին նվիրված պաշտոնական ընդունելություն Տալլինում

16 հոկտեմբերի, 2026

Հոկտեմբերի 13-ին Տալլինում տեղի ունեցավ պաշտոնական ընդունելություն՝ նվիրված Հայաստանի Հանրապետության անկախության 35-ամյակին։

Ողջույնի խոսքով հանդես եկավ Լիտվայում Հայաստանի Հանրապետության արտակարգ և լիազոր դեսպան Արա Մարգարյանը։

Իր խոսքում դեսպանն անդրադարձավ անկախ Հայաստանի անցած 35-ամյա ճանապարհին և Հայաստանի պետականության ամրապնդմանն ուղղված ջանքերին։ Նա ընդգծեց, որ Հայաստանի և Էստոնիայի պատմական փորձը տարբեր է, սակայն երկու ժողովուրդներին միավորում են ինքնիշխանության, ազատության և սեփական ապագան որոշելու իրավունքի հանդեպ հավատարմությունը։ 1991թ. օգոստոսի 20-ին Էստոնիան վերականգնեց իր անկախությունը, իսկ սեպտեմբերի 21-ին Հայաստանի ժողովուրդը հանրաքվեով քվեարկեց անկախ պետականության օգտին։

Անդրադարձ կատարվեց նաև Հայաստանի և Ադրբեջանի միջև խաղաղության գործընթացին ու տարածաշրջանային փոխկապակցվածության հեռանկարներին։ Դեսպանն ընդգծեց 2025թ. օգոստոսի Վաշինգտոնյան գագաթնաժողովի արդյունքները՝ խաղաղության համաձայնագրի նախաստորագրումը և TRIPP նախագիծը։ Նշվեց, որ TRIPP-ը տարածաշրջանային կապակցվածությանն ուղղված առանձին նախագիծ է և Հայաստանի «Խաղաղության խաչմերուկ» ավելի լայն նախաձեռնության կարևոր բաղադրիչներից մեկը։

Անդրադառնալով 2026թ. հունիսի 7-ին Հայաստանում կայացած խորհրդարանական ընտրություններին՝ դեսպանը նշեց, որ Հայաստանի քաղաքական ապագան որոշվել է քվեարկության միջոցով՝ Հայաստանի քաղաքացիների կողմից։

Դեսպանն ընդգծեց նաև Հայաստանի և Էստոնիայի միջև հարաբերությունների ակտիվ զարգացումը։ Կարևոր քայլեր են դարձել Էստոնիայի վարչապետ Քրիստեն Միխալի և արտաքին գործերի նախարար Մարգուս Ցահքնայի՝ Հայաստան կատարած այցերը, ինչպես նաև ապրիլի 9-ին Երևանում Էստոնիայի ռեզիդենտ դեսպանության բացումը և երկու երկրների արտաքին գործերի նախարարությունների միջև Ընդլայնված գործընկերության մասին փոխըմբռնման հուշագրի ստորագրումը։

Առանձնահատուկ ընդգծվեց թվային կառավարման, հանրային վարչարարության բարեփոխումների, կիբերանվտանգության, կրթության, ձեռնարկատիրության և զարգացման համագործակցության ոլորտներում Էստոնիայի փորձի ու երկու երկրների միջև գործընկերության կարևորությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր